السلام عليكم .......توفي صديقي عبد الباسط عن عمر يناهز ال 20سنة في حادث مرور أليم صدقوني لم أصدق الأمر بعد لأن صوته لا زال يرن في أدني و صورته و هو يحدثني لم تفارق خيالي و كان أخر من تكلم معه هو أنا لأنه توفي عندما كان قاصدا منزلهم بعد أن جلس معي يحدثني و هدا أخر ما قاله لي بالحرف الواحد ......... كنت رافد الشروق نقرا في الخبرتحت عنوان [ التغيير كان مبرمجا و سعدان تأخر في اعلانه]
....سامي قلبي راهو واجعني شوية
قلت له .واش غير الخير أنتا دايما هكا
قالي .....ما رانيش ناكل مليح هاد الأيام .....صمت قليلا ثم أردف........واش بيهم في دزاير قاع هبلوا ولينا نتبعوا البالون أكثر من اللازم حتى العجايز ولاو يعرفو
قتلو ....ايه واش تحب خير من والو
قالي ربي يهدينا السمانة لي فاتت زدموا على الأقصى واحد ما قيمهم و كي ضربونا المصارة الشروق دار حالة و المصاروة كيف كيف كي ربحناهم ما خلاولنا والو و كي اليهود يخربوا و يحقرو ما هدرت عليهم لا الشروق و لا الأهرام
قتلو مساكن راهم محقورين في فلسطين و حنا ما نقدروا نديروا والوا غير ندعوا كاش ما ينزل ملك من السماء و يروح يحررهم
قالي .....ماراناش في عصر المعجزات ياو ربي قال لن يغير الله مابقوم حتى يغيروا ما بأنفسهم و حنا ديما عقاب زياني و مطمور و الخاوة راهي ..............ايييييييييييييه سامي تفكرت حاجة رد بالك تدعي في صلاتك باش تربح دزاير ولا كاش ايكيب
قتلو علاش
قالي بلي سمعت بلي يقولو ما يجوزش الدعاء في حاجة نتاع اللهو قتلو وين راه المشكل
قالي..... و حنا ربي خلقنا باش نعبدوه ولا باش ندعوا للايكيبات
ضحكت وقتلو هنا عندك الحق
و قالي ........ما نخبيش عليك خويا سامي و الله حاس روحي مانيش مليح لازم نروح للدار
قتلو .....واش بيك مريض
قالي لالا حاس بضيقة الخاطر نروح نفطر خير المهم باسلامة وما تنساش الكاييي نتاع المنهجية نتاعي جيبهولي غدوة راني نسحقو
قتلو ماعليش أتهلا في روحك وبوسلي جميلة [ أختو الصغيرة] و هاك هادي خليها عندك و مدهالها [حبة حلوى]
أنا تانيت دخلت للدار بعد نصف ساعة حوالي الواحد زوالا كلمني ابن جيرانا سامي أرواح صحبك لي كان معاك دوكا ضرباتو كليو ومات سير بلاص
قتلو و مفاصلي كانت تهتز شكون قالك دك كان معايا
قالي شفتو كان يمشي قدامي كي كان راح يقطع الطريق ...
قتلو و شكزن قالك مات
قالي........ [ سامحوني على هاد العبارة] مخو كامل راه في الأرض و نتا تقولي يبقى حي ..........................
رحت نجري للدار و كنت نبكي لبست حوايجي و رحت للسبيطار خلاوني ندخل باش نشوفوا مي ماقدرتش [الله يرحمو] و كانوا خاوتو معاه و من بينهم جميلة الصغيرة كامل يبكو عليه.....دفناه البارح في جو جنائزي مهيب .....
أصدقائي في المنتدى ما تنساوش تترحمو عليه و أدعولو و تقدروا تقولولي كلاموا صح ولا لالا خاصة موضوع البالون
بليز سامحوني على الموضوع مي لازم نقولو خاصة و رانا قاع تايهين في هاد الدنيا و هنا مان نحسوش حتى يموت واحد عزيز علينا